Helene Bester sing Nana Mouskouri

Helene Bester bring met haar produksie Helene Bester sing Nana Mouskouri hulde aan hierdie legendariese Griekse sangeres. Die teks en regie word deur Frans Swart van Lefra Produksies hanteer en musiekregie is te danke aan Heinrich Pelser. “Ek het nog altyd gehoop om ‘n Nana-vertoning te doen. Ek is mal oor haar stem, en ek en my sussie het met haar musiek grootgeword,” vertel Helenè. “Ons het rerig gedink dat sy ‘n vriendin van my ma is. My ma en sy lyk so eenders.   Tog dink ek dat die tyd nóú eers ryp is vir my om die vertoning te doen. Ek glo nie dat ek hierdie musiek 10 jaar gelede so goed sou kon interpreteer nie. My stem is ook ouer en klink dalk meer volwasse, wat ek glo meer by haar teikengehoor aanklank sal vind. Ek het haar musiekvideo’s “opgeswot” om te kyk hoe sy op die verhoog beweeg, wat sy met haar hande doen en hoe sy ’n   gehoor meevoer. Mens wil dit tog so geloofwaardig moontlik maak.” Regisseur Frans Swart stem saam: “Toe Helenè my oor hierdie projek nader, was ek dadelik opgewonde. Wie dan nou beter as die talentvolle Helenè om hulde aan die tydlose en elegante Nana Mouskouri te bring?”