Potch Geesfees 2025

Ons is opgewonde om vir die 4de opeenvolgende jaar die Geesfees aan te bied by Lekwena net buite Potchefstroom vanaf 29 - 30 Augustus 2025.

Tydens die eerste twee jaar het ons, met die onwrikbare ondersteuning en deelname van ons gemeenskap, gehelp om 'n beduidende impak te maak op die fees se ondersteunde saak van Solidariteit Helpende Hand se nasionale #STOPHONGER Projek.

In 2024 het ons fokus verskuif, nader aan ons gemeenskap en met ons "Verfraai ons dorp” tema, kon ons R120 000 aan die Potchefstroom Sakekamer skenk. Hierdie fondse is gebruik om projekte en inisiatiewe te ondersteun wat ons dorp verfraai en verbeter.

Die Potch Geesfees is ook tydens die Potchefstroom Sakekamer se Jaarlikse Algemene Vergadering en toekenningsfunksie, aangewys as die #ProPotch Ondersteuner van die jaar.

Wat doen ons in 2025?

Met ‘n hartklop vir ons gemeenskap en ons fokus op Potchefstroom, is besluit op ‘n 2025 tema:

“Ploeg terug!”

Sluit by ons aan vir 'n naweek gevul met opwindende aktiwiteite, lewendige vermaak, heerlike kos, stalletjies met iets vir almal en die warmte van ons gemeenskapsgees.

Met ons missie om winste plaaslik te herbelê, sal jou ondersteuning nie net die feeservaring verbeter nie, maar ook bydra tot betekenisvolle gemeenskapsontwikkeling.

Ons sien uit na nog 'n onvergeetlike jaar saam met julle!